Press "Enter" to skip to content

Blariacum Baeregood sleit éin jaörke euver

“’t Vastelaovesseizoen 2021 liek now nog hiel wiëd weg, maar toch hebbe weej op dit moment de beslissing genaome um éin edisie euver te slaon en kommend jaor dus genne Blariacum Baeregood te halde. 
 
Die beslissing is genaome op basis van de volgende argumente. Zoelang d’r gen vaccin taege Covid 19 is, en idderein daomei ouk is ingeënt, blief ’t Corona-virus wereldwiëd ein probleem en mot idderein de “anderhalve maeter aafstandregel” blieve respectere. Wannier ein vaccin gevonde wuurt is op dit moment nog totaal onbekind. Det kin nog ein half jaor deure, maar ouk nog wal langer. De kans is dus hiel groët det d’r tiedes ’t kommende Vastelaovesseizoen nog geen vaccin veurhande is. Weej zeen gen meugelikhede om dan met circa 350 – 400 persoëne in t Raodhoes tegeliekertied beejein te komme. 

Blariacum Baeregood is idder jaor oetsloetend meugelik doordet weej financieel gesteund waere door ein groët aantal sponsore. Die sponsore hebbe ’t now al moejlik genog en motte zeen te euverlaeve met eur bedrieve. Weej zien van meining det weej os trouwe sponsore daorum neet meuge vraoge um ôs ouk ’t kommende jaor weer te steune. De veurbereidinge veur Blariacum Baeregood starte normaliter al nao ’t veurgaonde seizoen: artieste zeuke en contractere, sponsore benadere, aafspraoke make met ’t Raodhoes en ’t geluud, enz. Al os partners meuge van ôs op dit moment al duudelikheid verwachte. 

Det Blariacum Baeregood kommend jaor neet doorgeit is netuurlik jaomer, maar ouk neet mier as det. As weej dinke aan ôs sponsore zien de gevolge door de Corona-perikele veur eur vuuël erger en van ein gans andere orde. Daorum wille weej os trouwe sponsore ein hert onder de reem staeke en haope weej det zeej heej good doorhaer komme! En trouwes, Vastelaovend is neet aafhankelik van ein Vastelaovesbal, ein optôch of eine Prins. Nae, Vastelaovend is ein geveul. Ein
geveul vanoet dien hert. En ein geveul van saamhorigheid. Weej viere in 2022 wal
weer oetbundig de Vastelaovend same en zeen we ôs weer op Blariacum Baeregood”, aldus Blariacum Baeregood 

Blerickse Krant is een gratis uitgave van Kempen Media b.v. en verschijnt tweewekelijks in de even weken.