Press "Enter" to skip to content

Blariacum Baeregood viert dit jaor zien 2 x 11 jaörige jubileum

Dit jaor is ‘t 22 jaor geleeje det Blariacum Baeregood veur ’t iers zien deure aöpende in Blierick. Toen is ouk de Stichting Blariacum Baeregood in ’t laeve geroope met as doel: ‘Ut beejein bringe van Groët-Bliëricks muzikaal vastelaoves-talent, det zich gaer luuët huure aan ein zoe breit meugelik publiek, ein publiek det Groët-Bliërick ein werm vastelaoves hert toe druuëg.’

En dit doel streeve weej op d’n daag van vandaag nog altied nao! In die 22 jaor hebbe ein keur van artieste op de buun beej BB gestaon um Blierick aan de veuraovend van de Vastelaovend eine joeksige en kwante aovendte bezörge. Daomei waas ein gooje start van de Vastelaovend op Vastelaoves-zondaag gegarandeerd!! Dit jaor alweer veur de 22e kier!

Vanwege dit jubileum hebbe weej beslaote um vruuger te starte met de aovend. De deure gaon aope um 18.45 oor en ut programma start um 19.22 oor. Asse naor de Boetegewoëne Boetezitting bis gewaes heufse op truukwaeg nog gaar neet naor hoes te gaon en kinse beej os hiel good terech veur eine hiele gezellige –entreevreeje –vastelaovesaovend met geweldige artieste.

En um d’r veur te zörge det daags daornao idderein fit aan de start van de Blierickse optoch kin staon zal rond middernach de aovend waere aafgeslaote. Speciaal in verband met ’t jubileum pakke weej groët oet met 2 bekinde Groët-Venloose bands: Kwante Hippe en Appelemoos! Aafwisselend, maar ouk tegeliek same op ’t podium beej BB!! Jao, die gaon ôg én ôs nog verrasse dae aovend.

En det neet allein; ouk Sandra en Marco zien weer van de partie en de jônges van Pats-Boem-Paaf zulle eure naam ier aan doon en zette ‘t Raodhoes beslis op de kop! Maar ouk Vastelaovesgezelschap De Wortelepin met ziene nieje hoëgheid en adjudante make eur opwachting dae aovend, net as de winnende liedjes van de Wortelepin van dit seizoen.

De prissentasie van de aovend leejt in de hande van Marcel Schuurmans en Ruud Geraedts. Zeej zulle vanoet de hoeskamer van Baerdienke en Baerke og door de aovend leide. Dus det belaof zeker eine hiele tofte aovend te gaon waere waorse beslis beej wils zien!!

Blerickse Krant is een gratis uitgave van Kempen Media b.v. en verschijnt tweewekelijks in de even weken.